157 елді мекенді су басу қаупі бар. Бұл туралы Төтенше жағдайлар министрі мәлімдеді. Басты себеп еліміздің бірқатар өңірлерінде күн күрт жылынбақ. Қар еріп, сең жүріп арты табиғи апатқа ұласуы мүмкін. Зардап шеккен отбасылар қайтпек? Оларға мемлекет өстемақы төлейтін болды ма?
Кешегі түнді Атырау облысындағы Сағыз ауылының тұрғындары жанын шүберекке түйіп өткерді. Өңірлік төтенше жағдайлар департаментінің мәліметінше, қардың еруінен Ноғайты өзенінде су деңгейі шамамен 3 метрге көтерілген. Салдарынан әп-сәтте жақын маңдағы ауылға қауіп төнген.
Құтқарушылар су басу аймағына жақын 24 үйден 50 адамды, оның ішінде 23 баланы эвакуациялап, уақытша ауылдық колледж бен мектепке орналастырған.
Қуанышқа орай, өңірдегі жағдай бүгін қалыпқа келіпті. Тұрғындар өз үйлеріне оралды. Ауыл адамдары ақпан айынан бері өзен арнасынан осымен үшінші рет асып кеткенін айтады. Қазірде 157 елді мекен су басу қаупінің өтінде тұр. Төтенше жағдайлар министрі осылай дейді. Бүгінге дейін тіркелген тілсіз жаудың құрбандарына да өтемақы төленеді. Алайда, бір шарты бар.
Юрий Ильин — ҚР Төтенше жағдайлар министрі:
«Таяу күні ғана еліміздің бірнеше өңірінде қатты жел, боран болып төтенше жағдай жарияланды. Салдарынан мемлекеттік және жеке нысандар зардап шеккені белгілі. Осы орайда айтып өтетін жайт, жеке мүлкін сақтандырған абзал. Яғни төтенше жағдай болған сәтте сақтандыру бойынша өтемақы төленеді. Осындай жағдайда өтемақы төлеу үшін биыл республикалық бюджеттен 7 млрд теңгеге жуық қаржы қарастырылды».
Министр келтірген мәліметке сәйкес, төтенше жағдайда өтемақы төлеу үшін биыл республикалық бюджеттен 7 млрд теңгеге жуық қаржы қарастырылған.
