Дүлей дауыл Қазақстанда дүрбелең туғызды. Табиғаттың тосын мінезінен 6 адам зардап шегіп отыр. Оның үшеуі бала. Төтеншеліктер жолда қалған мыңға жуық адамды эвакуациялады. Ауа райының әп-сәтте бұлай құбылуына не себеп? Бораннан келген залал қандай?
Бұл кадрден дүлей дауылдың Алматы әуежайында тұрған ұшақтың өзін 90 градусқа теңселткенін байқауға болады. Боранның күштілігін осыдан ақ бағамдай беріңіз. Қолайсыз ауа райы тек екінші мегаполисте емес, елдің біраз аймағанда ойран салды. Кесірінен Қазақстан бойынша 70 мыңнан астам абонент жарықсыз қалды. Үйлердің де шатыры ұшып кеткен.
Боран салдарынан республика аумағында жол-көлік оқиғалары да жиілеген. Мәселен, елордада бір тәулікте 125 транспорт құралы соқтығысқан. Дауылды ескертуге байланысты 111 жол учаскесі жабық тұр.
Жолдарда төтенше жағдайларды жою мақсатында жедел штаб құрылып, аймақтық құтқару бөлімшелері боранда қалған 814 адамды эвакуациялады.
Сондай ақ, ауа-райының қолайсыздығынан елорда әуежайынан ұшып шығатын 16 рейс тоқтатылып, 28 рейс кешіктіріліп жатыр. 12 жолаушылар пойызы жолда тұралап қалды. Күн райының бұлай құбылуын мамандар былай түсіндіреді.
Ал Түркістанда бүгін ауа-райы керемет. Сынап бағанасы +14 градусты көрсетіп тұр. Байқасаңыздар, тіпті жеңіл жейдемен жүрміз. Қазгидромет берген мәліметке сенсек, алдағы күндері еліміздің барлық аймағында күн жылынады.
