Мәсімовтің қымбат сарайлары мен қыруар қаржысы тәркіленді

Құны 2,5 млрд теңге тұратын жекежай. Бизнес санатындағы 11 қымбат көлік пен 17 млн АҚШ доллары. Бұл Кәрім Мәсімовке тиесілі тәркіленген мүліктің бір парасы. Ұлттық қауіпсіздік комитеті мемлекетке сатқындық жасады деген күдікпен ұсталған бұрынғы басшысына қатысты бірқатар дерек анықталды. Атап айтқанда, ұлттық қауіпсіздік комитетінің төрағасы болған кезінде жабық келісімдердің бірі бойынша шет елден оған 2 млн доллар көлемінде пара берілгені мәлім болды. Бұл қаржы Гонконгтен Қазақстанның Ұлттық банкіне қайтарылды. Сонымен қатар, Мәсімов Премьер-Министр болған кезінде бизнес-құрылымнан Елордада құны 2,5 млрд теңге элиталық тұрғын үй мен жер телімін алған. Одан бөлек бизнес санаттағы 11 қымбат автомашина тәркіленді. Елордадағы екі қымбат пәтеріне Алматыдағы жекежай мен Щучинск-Бурабай курорттық аймақтағы жер теліміне тыйым салынған.