Старбакс, Макдональдс, Кока-кола енді Ресейде жұмыс істемейді. Небәрі екі күннің ішінде аталған әлемдік брендтер федаральды мемлекеттің агрессиялық әрекеттеріне қарсы осындай шешім қабылдады. Бұл, санкция қабылдаған компаниялардың бір бөлігі ғана. Нетфликс стримингтік сервисі енді Ресейде мүлдем сериал көрсетпесе, жетекші гигиеналық заттарды шығаратын проктер энд гэмбл су сабындарын сатпайды. Ал, АҚШ пен батыс елдері ресейлік мұнай өнімдерін экспорттауды тоқтату мәселесін қарастырып жатыр.
Әлемге танымал Макдональдс компаниясының қазір Ресейдегі 850 нүктесі жабылатыны хабарланды. Салдарынан 60 мыңнан астам адам жұмыссыз қалуы мүмкін. Сондықтан солтүстіктегі көрші ел азаматтары үшін осы бургер мен кока-кола енді таңсық асқа айналуы мүмкін.
Ал, мына видеодан тиімді бағамен тұрмыстық заттарды сататын Икеа дүкеніндегі ұзын-сонар кезекті байқауға болады. Себебі, шетелдік компаниялар соңғы заттарын сатып, дүкендерін жабуға дайындалып жатыр. Компаниялар біраз шығынға батса да, Ресейде өз жұмыстарын жалғастыра алмаймыз дейді. Осылайша, Ресейліктер санкцияның зардабын тарта бастады.
Виктория Нуланд – АҚШ мемлекеттік хатшысының орынбасары:
«Ресейдің 30 жыл бойғы жеткен жетістігінің 12 күнде-ақ күл-талқаны шықты. Бұл бір адамның ғана қажеттілігінен туындаған соғыс. Біз Ресейлік олигархтар, Путин және оның жанындағы жақын адамдарына қарсы санкция салдық. Одан бөлек, Ресей 40 елге қару-жарақ сатып келді. Енді ол табысынан да айырылады».
Қазір АҚШ Ресей мұнайын алмастырудың жолын іздеп жатыр. Қазір бренд маркалы мұнайдің бір баррелінің құны 120 доллардан асып тұр. Бұл Ресейге түсетін табыс көлемін сақтап тұр. Сондықтан, АҚШ Еуропа елдері үшін басқа шикізат көздерін іздеуде.
Джо Байден – АҚШ президенті:
«Путиннің Украинаға қарсы соғысы мұнай және газ бағасының артуына әкеліп-соғатынын түсіндік. Енді Ресей санкцияларға жауап ретінде, өз табысын арттыру үшін бағаны көбейтіп жатыр. Бірақ, осы ретте, Америка халқының 80-пайызы осыған қарамастан біздің саясатымызды қолдағаны бізді қуантты».
Осылайша, барлық саладағы тауарлар мен қызметтер Ресей нарығынан кетті. Сарапшылардың пікірінше, бұдан туындаған дефицит Ресейде шағын гуманитарлық дағадарыс тудырады.
