Бүгін елордадағы «Тіл-Қазына» ұлттық ғылыми-практикалық орталығында қазақ тілін үйренуде қолданылатын тиімді әдіс-тәсілдер талқыланды, деп хабарлайды ҚазАқпарат тілшісі.
Жиынға тіл мамандары, оқу орталықтарының басшылары мен қазақ тілін үйреніп жүрген 20-ға жуық түрлі ұлт өкілдері қатысты. Басқосуда мемлекеттік тілде сөйлеу, жазу дағдыларын үйрететін компьютерлік бағдарламалар мен мобильді қосымшалар таныстырылды.
«Қазақша үйрен» оқу орталығының басшысы Айгүл Даден қазіргі таңда өзге ұлт өкілдері тарапынан қазақ тілін үйренуге деген сұраныстың жоғары екенін жеткізді.
«Бұл орталықты ашуымыздың себебі – сұраныстың жоғары болуы. Бастапқыда біз шәкірттерді онлайн оқыттық. Кейін Астана қаласындағы білім алушыларды офлайн форматта оқытуға көштік. Қазіргі кезде барлық ұлт өкілдері қазақша үйренеді, сұраныс өте көп. Тіпті, Ресейден келіп оқып жатқан азаматтар мен лауазымды тұлғалар да бар. Екі жылдың ішінде 2500-ден астам азамат білім алды. Бірақ бізде негізінен мектеп оқушылары көп», — деді «Қазақша үйрен» оқу орталығының басшысы.
Оның айтуынша, бүгінгі таңда қазақша үйренуге өзге ел азаматтары да ниет білдіре бастаған. Мәселен, Чехия, Бразилия, АҚШ және Францияда жүріп, қазақ тілін үйреніп жатқандар бар.
