Қазығұрт пен Сарыағаш ауданындағы жағдайға қатысты комиссия құрылды. Түркістан облысының әкімі Өмірзақ Шөкеевтің айтуынша, шығындар объективті есептелуі тиіс. Мал шығыны бойынша Ауыл шаруашылығы басқармасы тиісті шешім қабылдап, заң шеңберінде өз міндеттерін орындамақ. Облыстық төтенше жағдайлар департаментінің бастығы Нұрғали Жүнісовтің айтуынша, төтеншеліктер көз ілместен қызмет етіп, қазір қауіп-қатер сейілген. Эвакуацияланған 50 тұрғын өз үйлеріне қайтарылған.
Нұрғали Жүнісов — Түркістан облыстық төтенше жағдайлар департаментінің бастығы:
«Қазығұрттағы 4 елді мекен мен Сарыағаштағы бір елді мекенде жауын-шашын салдарын жою бағытында түнімен жұмыс жүргенін, әлі де жалғасып жатқанын мәлімдеді. Анықталғандай, 53 үйдің ауласына, сонымен бірге 18 үй, 1 мейрамхана мен 16 ғимаратқа су кірген. Төтенше жағдай салдарын жоюға облыстық төтенше жағдайлар департаментінің 56 және жергілікті әкімдіктің 19 қызметкері жұмылдырылған. 15 техника мен 13 мотопомпа тартылған. Адам шығыны жоқ, жағдай толық бақылауға алынған. Мал шығыны есептелуде. Жалпы, қауіп-қатер сейілді. Эвакуацияланған 50 тұрғын өз үйлеріне қайтарылды. Жұмыс жалғасып жатыр».
