Мемлекеттік қарыз жыл басында 22 трлн теңгеге жетті. Депутат Нұрлан Бекенов Сенат отырысында сыртқы мемлекеттік қарыздың өсуіне алаңдаушылығын білдірді. Оның айтуынша, Үкіметтің сыртқы борышы шекті мәнге жақындап келеді. Қазіргі таңда жалпы сомасы 12,2 млрд долларды құрайтын үкіметтік сыртқы 52 қарыз бар. Оның 80 пайызы ғана игерілген. Сенатор еліміздің сыртқы қарызының артуына ықпал ететін негізгі факторларды тізіп шықты.
Нұрлан Бекенов – ҚР Парламенті сенатының депутаты:
«Қазақстанның сыртқы қарыздарының артуына басты себеп- тиімсіз пайдалану, қарыз ақшаға сұраныстың жоқтығы, несиенің бір бөлігін жою, сондай-ақ квазимемлекеттік компаниялардың ақшаны өндірістік емес мақсатқа тартуы. Бұны қаржыландырудың ағымдағы бағыттарын жіті талдап, жобалық-сметалық құжаттаманың құнын нақты реттеуіміз керек».
