Шымкентте аса ірі мөлшерде синтетикалық есірткі таратып келген 26 жастағы тұрғын ұсталды, деп хабарлайды ҚазАқпарат.
Тергеу барысында күдіктінің оңай ақша табу мақсатында әлеуметтік желі арқылы есірткі курьері болып жұмысқа орналасқаны белгілі болды.
Кейіннен жұмысын жақсы атқарғаны үшін «көтерме-саудагер» деңгейіне көтеріліп, шағын мөлшерден ірі және аса ірі мөлшерде синтетикалық есірткі таратуға көшкен.
Сосын оны тұтынушыларға жеткізу мақсатында сақтап, тасымалдап, жасырын орындарға тығып келген.
Күдікті автокөлігімен кезекті есірткі заттарын таратуға шыққан сәтте қолға түсті.
Көліктің алдыңғы орындығының астына тығылған сөмкесінен 7 дана жапсырмаға оралған синтетикалық есірткі тәркіленіп алынды.
Сонымен қатар, ол тығып үлгерген жерлерден тағы қосымша 2 дана жапсырмаға оралған 30 дана сым қабықшаларына салынған синтетикалық есірткі табылды.
Тұрғылықты мекенжайы бойынша тексеру жұмыстарын жүргізу кезінде бөлшектеп таратуға арналған екі дана есірткі алынды.
«Шымкент қаласы полиция департаменті есірткі қылмысына қарсы іс-қимыл басқармасының қызметкерлерімен «Қарасора-2022» жедел-профилактикалық іс-шарасы қарқынды жүріп жатыр. Кезекті іс-шара барысында қала аумағында аса ірі мөлшерде синтетикалық есірткілерді таратумен айналысқан 26 жастағы тұрғын ұсталды. Сараптама қорытындысына сәйкес, тәркіленген синтетикалық есірткінің жалпы салмағы — 150 грамнан асады. Бүгінде аталған азаматқа қатысты ҚК 296-бабының 4-бөлігімен қылмыстық іс қозғалып, сотқа дейінгі тергеп-тексеру басталды. Күдікті уақытша ұстау изоляторына қамауға алынды» — делінген Шымкент қаласы полиция департаментінің баспасөз қызметі таратан ақпаратта.
