Шымкенттегі мазарда бейіттер ойылып түсіп жатыр. Осындай жазбамен жарияланған видео әлеуметтік желіде қызу талқыға түсті. Кейіннен оның ол бейіттің Қайтпас-1 шағынауданында түсірілгені анықталды. Мұсылмандар жерленген мазарда ойықтар қайдан болды? Толассыз жауған жаңбырдың салдары ма әлде біреулер әдейлеп қазып кеткен бе?
Бұл Қайтпас-1 шағынаудынындағы мұсылмандар жерленген мазар. Белгісіз жағдаймен қабырдың үстіндегі топырақтар опырылып ойықтар пайда болған. Казнетті шулатқан видеоға халық әртүрлі пікір қалдырған. Бірі мұны қалыпты жағдай десе, осы уақытқа дейін жаңбырдан мұндай жағдай болмаған деп таң қалып жатыр.
Дауға айналған мәселеге қатысты Қаратау аудандық әкімдігі мәлімдеме жасады. Ондағылардың сөзінше, бәріне қолайсыз ауа райы кінәлі. Қазіргі таңда жергілікті тұрғындар мен демеушілердің көмегімен топырақ алынып, қалыпқа келтіру жұмыстары жүргізілуде. Шұрық тесікке айналған моланың басым бөлігі топырағы кеппеген жаңа бейіттер екен.
Нұржан Дүйсенов — Қаратау ауданы әкімдігінің бөлім басшысы:
«Соңғы бір айдың көлемінде тоқтаусыз жаңбыр жауып жатыр, қар араласып. Ол түсіп кеткен себебі жаңбырдың себебінен. Шамамен 50-ден астам бейіттің топырағы ойылып, астына түсіп кеткен. Шамамен жартысынан көбін сол жердегі жергілікті тұрғындар, сол жердің өздерінің туған туыстары, мешіт имамдары және шырақшылар қазір жауып жатыр. Жауылмағандарының өзінің үстін кленкамен жауып қойды».
Биыл Қаратау ауданындағы мазарларды күтіп ұстауға жергілікті бюджеттен 29 млн 300 мың теңге қаражат бөлінген. Бірақ әкімдік өкілінің сөзінше, бұл қаржы тек бейіт маңындағы қоқыстарды тазалау, шөп ору және тал қырқу жұмыстарына жұмсалады. Әрі оған шамамен 20 қызметкер жұмылдырылған.
