Түркістан облысы Шардара ауданында қойшы өзіне сеніп тапсырылған 400-ден астам қойды сатып жіберген. Күдіктінің қылмысы мал иесінің қойларды түгендеуі барысында анықталған, деп хабарлайды Turkistanzaman ҚазАқпаратқа сілтеме жасап.
Облыстық ПД баспасөз қызметінің мәліметінше, Ұзын ата ауылында тұратын мал иесі полицияға арызданған. Ол қойшыға сеніп тапсырған малдарының жоғалуынан өзіне 23 миллион теңгеден астам шығын келгенін жеткізген.
Оқиға орнына барған тәртіп сақшылары қойшының Ордабасы ауданының тұрғыны екенін анықтайды. Белгілі болғанындай, сезікті ер адам өткен жылдың тамыз айынан бері ұсақ малды біртіндеп сатып, өз пайдасына жаратып келген. Ал мұны жәбірленуші арада жыл өткен соң білген. Ол малын түгендегенде 400-ден аса қойдың жетпейтінін байқаған. Қазіргі таңда күдікті уақытша ұстау абақтысына қамалды.
«Күдіктіге қатысты сотқа дейінгі тергеу амалдары жүргізіле бастады. Аталған жайтты полиция қызметкерлері ҚР ҚК-нің 189-бабы «Сеніп тапсырылған бөтен мүлікті иемденіп алу немесе талан-таражға салу» бойынша тіркеуге алды», — делінген полиция хабарламасында.
