Украинаның әскері мен бейбіт тұрғындарына қарсы Ресей күштері химиялық қару қолдануы мүмкін. Бұл туралы Мемлекет басшысы Владимир Зеленский мәлімдеді. Ал Ресей әскері Донбасста қайта ұйымдасып, қару-жарақ қорын толтыруға кіріскен. Мұны батыс барлаушылары мәлімдеді. Дегенмен шабуыл бүгін-ертең басталады деген ақпарат жоқ.
Мариупольдегі ұрыстарда Украинаның «Азов» батальоны мен аумақтық қорғаныс күштері қарсыласын шегіндіре бастады. Сондықтан, Донецк Халық Республикасының Ішкі Істер Министрі Эдуард Басурин ол жерге шабуыл жасау қауіпті, сол үшін бірден химиялық қару қолдану керектігін айтқан. Осыған орай, Зеленский Ресейге қарсы салынатын санкциялардың 6-ы легін тездету керектігін және оның ішінде мұнайдан толықтай бас тарту керектігін мәлімдеді.
Владимир Зеленский – Украина президенті:
«Ресейлік оккупанттардың спикерлерінің бірі Мариуполь қорғаушыларына қарсы химиялық қару қолданатынын айтты. Осыған дейін бұл мәселе талқыланғанын әлем елдерінің басшыларына айтқым келеді. Ресейге қарсы бірден жойқын санкциялар салу керек. Одан бөлек, келесі санкцияларда Ресейдің мұнайы мен газынан толық бас тарту керек. Себебі, шикізат үшін төленген әр доллар украиналықтарды өлтіру үшін бөлінген қаржы».
Пентагонның айтқаны тағы келді. Ресей әскерінің мейірімділік танытып, Киевтен шегінгені жай ғана әскери айла болып шықты. Бұл туралы АҚШ пен Ұлыбритания барлау қызметтері ескерткен еді. Киевтен Беларуське қайтып, айналған Ресей әскері Донецк пен Луганск облыстарына шабуыл жасау үшін жинала бастады.
Джон Кирби – АҚШ Қорғаныс министрлігінің ресми өкілі:
«Біз бастапқыда жер серіктік суреттерді көргенде бірден күдіктене бастадық. Одан кейін ақпарат құралдарынан Изюм қаласына бағытталған әскери техниканы көрдім. Бұл Донбасстағы әскерді күшейтудің бір амалы. Біз қазір барынша Украина Қарулы Күштеріне көмектесудің амалын қарастырып жатырмыз. Президент шешім қабылдап, қару мен техника жіберем деген шешімінен кейін ол техника 4-6 күнде украиналық сарбаздың қолына беріліп жатыр. Бұл өте жақсы деп санаймын».
Ресей әскері тыйым салынған жаяу әскерге қарсы миналарды Харьковте тұрғын үйлердің жанында орнатып кеткен. Ол 1997-і жылдан бері Женева конвенциясымен тыйым салынған. Ол конвенцияға 164 мемлекет қол қойған.
Николай – Саперлік бөлім командирі:
«Бұл миналардың өзінен-өзі жарылу таймері бар. Ол 3-40 сағат аралығында аяқ асты жарылады. Орыстар минаны бейбіт адамдардың жанына қойып кеткен. Біз қазір оларды жойып жатырмыз».
Айта кетер жайт, Мариуполь мэры Вадим Бойченконың айтуынша Ресей мобильді крематорий әкелген. Оны опат болған өз әскерилерінің денесін жою үшін жасалып жатыр дейді.
