Бучадағы қырғын бойынша жаңа деректер пайда болды. Украинаның бас прокуратурасының мәліметі бойынша 67 адам «Бауырластар бейітінде» жерленген. Ал, Украина Президенті Владимир Зеленский Ресей әскері жаңа одан да жойқын соққы жасауға дайындалып жатқанын айтты.
Бучада қаза болғандар жайлы түрлі деректер келтіріліп келді. Бастапқыда 280, кейіннен 410 болды. Сот сараптамасын жүргізіп жатқан Украина Прокуратурасы мен халықаралық ұйымдар әлі де құрбандар санын анықтап жатыр. Өткен аптада құр далада жатқан мәйіттердің саны 280 болса, енді бауырластар бейіттерінде 67 адам жерленгені белгілі болды. Ең сорақысы ол бауырластар бейіттері дәл тұрғын үйлердің ауласында орналасқан.
Ирина Венедиктова – Ккраина Бас прокуроры:
«Біз қазір 67 мәйіттің тек 18-ін шығардық. Ішіндегі 16 адам нақты оқпен өлтірілген. Бірінші кезекте, біз бұл қылмыстарды өзіміз үшін тергемекпіз. Қазірдің өзінде 5000 қылмыстық іс қозғадық. Сонымен қатар, геноцид секілді қылмыстармен айналысатын Халықаралық Қылмыстық Сот та жақын арада Украинаға келеді. Еуропалық Одақ та Ресей қылмысын тергеу үшін көмектеседі деп күтілуде».
Бейітте 67 адамның жерленгені туралы ақпаратты жергілікті шіркеу басшысы Андрей Галавин да растады. Әулие әкей марқұмдарды қайтадан барлық жоралғысын жасап, ақтық сапарға шығарып салды.
Андрей Галавин – Украина Православ шіркеуінің өкілі:
«Мәйіттердің саны 67 болды. Олар жер астында болса да, иттер оларды жұлмалап жатыр екен. Мәйітханада электр қуаты жоқ, мұздатқыштары жұмыс істемейді. Жергілікті билік ары ойланып, бері ойланып, үйдің ауласында көмуге шешім қабылдапты».
Украина Президенті Владимир Зеленский ресми түрде Батыс барлау қызметтерінің ақпаратын растады. Ол бойынша Ресей билігінің Украинамен келіссөздерден кейін мейірім таныту үшін Киевтен әскерін алып кетті деген ақпарат өтірік болып шықты. Ресей әскері Беларусь арқылы шегініп, Донецк пен Луганск облыстарына жиналуда. Олар, жаңа жойқын шабуылға дайындалу үшін қолданылған айла дейді Зеленский.
Владимир Зеленский – Украина президенті:
«Біз не болса да, қорғанып, қарсы шабуыл жасауға ұмтыламыз. Біз Украина жеріне басып кіріп, бейбіт тұрғынды өлтірген әрбір ресейлік жексұрынды жазалауға тырысамыз. Олар Украинаға қарсы одан да көп, зымыран мен әуе бомбаларын тастауы мүмкін. Бірақ, Украина оған да дайын».
Естеріңізге сала кетейік Ресей билігі Буча қырғынын әлі де мойындаған жоқ. Ресми Мәскеу бұл туралы бірде фейк және ол актерлер десе, енді бірде оларды Украина әскерінің өзі өлтірді деп жалтаруда.
