Түркістан облысында халықаралық балаларды қорғау күніне арналған «Тұран Бала фест» он күндігі өтіп жатыр. Аталмыш шара шеңберінде Түркістан қаласында «Тұлпар мініп ту алған» атты өнер фестивалінің қорытынды гала концерті өтті. 17 ауданнан келген 500 ге жуық дарынды жас өз өнерлерін ортаға салды.
Аталмыш шара Түркістан облысы адами әлеуетті дамыту басқармасы «облыстық қосымша білім беруді дамыту» орталығының ұйымдастыруымен өтті. Фестивальде білім ошақтары ұлттық бұйымдар, қолөнер туындылары мен қатар композициялық жұмыстарын ұсынды. Сондай-ақ өнерпаздар түрлі қойылымдар қойып, көрермен ықыласына бөленді. Айта кетсек, өнер додасына 20 мыңға жуық жас қатысқан. Ұйымдастырушылардың айтуынша, фестивальдің мақсаты- ұлттық құндылықтарымызды кеңінен насихаттап, жас таланттарды анықтау.
Ардақ Мәдіханқызы – Облыстық адами әлеуетті дамыту басқармасы басшысының орынбасары:
«Жалпы биылғы балалар жылы шеңберінде облыста үлкен мерекелер өтіп жатыр. Балалар жылына жалғыз мереке емес, облыс деңгейінде барлық салалар: денсаулық, әлеуметтік, қауіпсіздік сала бәрі қосылып, үлкен шара облыс әкімі Өмірзақ Естайұлымен бекітілген үлкен іс-шаралар түзілген. Ол енді бүкіл жыл бойы, келесі жылы да дәстүрге айналдыру керек. Балалардың қауіпсіздігін жан-жақты дамуына атсалысу. Негізінде бұл іс-шара былтырғы жылы респуликадан келген. Бірақ біздің Түркістанда бұл басқа үрдіс алып, жыл сайын осы атаумен үлкен фестиваль өтеді».
Сайысқа сонымен бірге мың бұралған бишілер де қатысты. Олар түрлі байқаулардан топ жарып, облыстық додаға жолдама алған.
Ясмин Махмут — Фестиваль қатысушысы:
«Біз Мақтаарал ауданы 31 ші жалпы орта мектебінің « Айсәуле» би тобымыз. Біз үлкен облыстық сайысқа жеткенімізге қуанамыз. Түркістан қаласына үлкен жаңалықпен жеткенімізге өте қатты қуандық. Тұлпар мініп ту алған атты үлкен байқауда біз өзіміз гран-при ұтып, облыстық кезеңіне өттік. Би тобымызда біз 10 қызбыз. Олардың барлығы өнерлі, осындай белестерге жеткенімізге өте қатты қуанамыз»
Фестиваль қорытындысы бойынша, бас жүлдені Төле би ауданының өнерпаздары қанжығалады. Ал 1-ші орын Бәйдібек ауданына бұйырды. Жеңімпаздарға 300 мың тенгелік сертификаттар, диплом және алғыс хаттар берілді. Айта кетерлігі онкүндік аясындағы шаралар жалғасын табады. Мәселен 1-ші маусым күні қаладағы Керуен сарай кешенінде мерекелік концерт ұйымдастырылады.
