Түркістанға «FlyArystan» әуе компаниясымен бірге саяхаттаңыз. Әуе кеңістігіне алғаш рет 2019 жылы қанат қаққан компания мен Turkistan телеарнасы меморандумға қол қойды. Ресми құжатқа сәйкес жолаушыларды әуе жолымен тасымалдайтын компания «Түркістанды көргім келеді» байқауының ресми демеушісі атанды.
FlyArystan әуе компаниясының қызметі бүгінде халық арасында үлкен сұранысқа ие. Аталған компанияның ұшақтары Түркістанға алғаш рет 2020 жылдың желтоқсан айында қонған болатын. Сол кезден бері киелі шаһар мен еліміздің өзге аймақтарымен әуе байланысы үзілген емес. Ал бүгін аталған компания «Түркістанды көргім келеді» жобасына демеушілік етуде.
Айта кетсек, Түркістан қаласының туризмін дамыту мақсатында облыс әкімдігі арнамызбен бірлесіп, «Түркістанды көргім келеді!» байқауын жариялаған болатын. Жобаның басты мақсаты – тарихы терең түрленген Түркістанды көпшілікке таныстыру. Әрі облыс болғанына 4 жыл толған киелі өлкенің туристік потенциалының қаншалықты артқанын көрсету. Бұл ретте Fly Arystan әуе компаниясының мүмкіндіктері жоба үшін өте маңызды.
Сайыс 3 кезеңнен тұрады. Іріктеу кезеңінде жобаға қатысқысы келетін азамат өз қаласын көрсете отырып Түркістанды не үшін көргісі келетіні жайында 1 минуттық бейнеролик түсіріп, өзінің «Instagram» парақшасында #түркістандыкөргімкеледі хештегімен пост жариялауы қажет. Іріктеу baiqau.turkistan.tv сайтында қалың көрерменің дауыс беруі арқылы анықталады. Сондықтан видеосын жариялаған қатысушы baiqau.turkistan.tv сайтына кіріп міндетті түрде тіркелуі керек. Ең қызықты бейнеролик әзірлеген 5 адам Түркістанға жолдама алады. Бірінші кезеңнен өткен 5 үміткердің барлық шығыны ұйымдастырушылар тарапынан өтелетін болады. Жұмыстар 10 шілдеге дейін қабылданады.
