Қорқыт туралы аңыз». Дәл осы атаумен Түркістан музыкалық драма театры жаңа премьераның тұсауын кесті. Түркі елдеріне ортақ абыздың жан дүниесі — хареография тілінде көрерменге философиялық ой тастады. Жоғары дейгейдегі декорация, құбылмалы әуендер операмен үйлесім тапқан.
Алай-дүлей дауыл мен өмірмен арпалыс. Опера мен балет. Мұның бәрі Түркістан музыкалық драма театрының алғашқы пластикалық спекткалінде көре аласыз. «Қорқыт туралы аңыз»-да жыраудың жер бетін араздық алаңына айналдырмақ болған пері қызы Мартудың айқасы замануи хареография тілімен бейнеленді. Ұтқыр шешім тапқан көріністі қоюға ресейлік балетмейстер Константин Семенов шақырылған.
Константин Семенов — қоюшы режиссер:
«Баршаңыз куә болған мұндай қойылым Қазақстанда алғаш рет сахналануда десем, артық айтқаным емес. Біз Қорқыттың қазақы дүниетаным үшін қандай қастерлі екенін білеміз. Дегенмен, жастардың да қызығушылығын ояту мақсатында барынша жаңа форматта ұсынуға тырыстық».
Қойылымды ерекше әуенмен әрлеген белгілі компазитор Хамит Шанғалиев. Ал театр басшысы Айнұр Көпбасарованың өзі көркемдік жетекшілік етті. Жалпы, мың бұралған бишілерге жан бітірген спектакль Ермек Аманшаевтың либреттосы бойынша қойылған. Қобызшы Қорқыттың рөлін жас театрдың белді мүшесі Еламан Әбдіхалық сомдап шықты.
Еламан Әбдіхалық – актер:
«Біз бұл спектакльге 3 ай бойы тынымсыз дайындалдық. Себебі, біз үшін жаңа бағыттағы би түрі болды. Мен Қорқыт туралы аңыздарды зерттеп, салыстырып, кейіпкерімнің өмірін сүруге тырыстым. Қолымнан келді деп ойлаймын. Жұмыстан тыс уақытта да бар ойымды осы қойылымға, өз образыма арнағандықтан, қатты қорқыныш болмады»
Айта кетейік, бұл Түркістан музыкалық драма театрының биылғы төртінші қойылымы. Бұған дейін театр әртістері «Бөрте», «Махаббат мұнарасы», «Фариза» атты қойылымдарды сахналап, көрермен көзайымына айналған болатын.
