Құрылыс материалдарын өндіретін зауыттар ауылдың ішіп отырған суын құртты. Түркістан облысы Сауран ауданы Шорнақ тұрғындары осылай дейді. Жер қойнауынан тас, топырақ, қиыршық қазатын кәсіпорындар қаптап кеткен. Соның кесірінен ауылға келетін су лайға айналып, деңгейі түсіп кеткен. Құдықтағы суды адам түгілі төрт түлік те іше алмайды деген олар зауыттардың жабылуын талап етті.
Құрамына 12 ауылдык округ кіретін Сауран ауданында 22 тас зауыты бар. Олардың қазып тастаған карьерлердің қанша екені айтпаса да түсінікті! Бұрын 8 метрден су шықса, қазір 20 метр тереңдіктен әзер көрінеді. Құдықтан су шыққан күннің өзінде -лай аралас, — дейді тұрғындар.
Бердібек Әнетбеков – ауыл тұрғыны:
«Карьерлардың зардабын қара халық көріп отыр. Жер асты суларымыз төмендеп кетті. 18 метрсіз шықпайды. Оның өзін ішуге қорқамыз. Себебі, мына заводтар 11 метр биіктікте тұр. Біздің құдығымыз 18 м болғанда, 7 метр ғана айырмашылық. Қазған жерлерін жаппай кеткен. Өлекселер жиналып, адам да түсіп өлді».
Ауыл тұрғындары 22 тас зауыттың да жаппай жабылуын сұрайды. Себебі, таза су ішпегендіктен дімкәс балалар да туылуда дейді. Оған қоса ашық қалған карьерларға адам түсіп қайтыс болған екен.
Бердібек Әнетбеков – ауыл тұрғыны:
«Олар қанша метр қазу керек? Олар қазып қазып суын шығарып жіберіп жатыр. Біздің аналарымыз, келіндеріміз дімкәс балалар туылып жатыр»
Мамандар тас зауыттарын тексеруді бастады. Алайда, олар заң аясында құжаты дұрыс болса, жұмыстарын жалғыстара береді дейді. Тұрғындар арман қылған таза суға бүгін ертең қол жеткізбейтін сыңайлы.
Болысбек Шәріпбеков – аудандық кәсіпкерлік және туризм бөлімінің басшысы:
«Біз енді енді зерттеу жұмыстарын жасаймыз. Қазір госактісін тексерудеміз. Сәйкес болмаса жабылады.Бұл туралы біз білеміз. Барлық карьерды аралап шыққанбыз. Егер заңдық құжаттары сәйкес келсе ары қарай жұмыс істей береді».
Бүгінде Шорнаққа қарайтын 3 округ Ақбұлақ су мұнарасын амалдауда. Оның өзі үй -үйге кіріп үлгермеген. Аудандағы 22 тас зауыттан бөлек, тағы 48 і іске қосылуы мүмкін екен. Олар кемінде 18 жылға дейін жұмыс істейді.
