Елімізде спорт алаңдары тапшы. Бар спорттық ғимараттың өзі талапқа сәй келмейді деп мәдениет және спорт министрі Дәурен Абаев дабыл қақты. Айтуынша, елді мекендерде 1 млн шаршы метрден аса спорт залға деген қажеттілік бар. Спорт кешендерінен ада өңірлер қатарын Түркістан облысы бастап тұр. Бұдан өзге 3 мегаполисте де жағдай осындай.
Отырар ауданындағы Қоғам ауылының жалғыз спорт алаңшасы бар екен. Аты бар, заты жоқ алаңда ойнамақ түгілі, адымыңды аңдап басасың дейді бейнетаспа иесі
Тұрғын:
«Осы алаң ашылғанына 2 жыл болды. Доп қуалап ойнап жүрген ешкімді көрген жоқпыз. Ешқандай жағдай жасалмаған .Қақпасының сиқы мынау темірден өрілген. Сетка емес. Түнде ешқашан жарығы жанбаған. Айдалада орналасқан. Жолы нашар».
Қанат Жолдықараев – Облыстық дене шынықтыру және спорт басқармасының басшысы:
«Барлық елді мекен спорт алаңдары мен спорт залдармен толық қамтамасыз етілген».
Спорт басқармасының басшысы дәл осылай спортты дамыту мақсатында атқарылған жұмыстарын баяндады. Қоғам ауылындағы келте алаңның жайжапсарын сұрап едік, бірден айтқан сөзінен тайқып аудандық әкімшілік пен ауа райын кінәлады
Қанат Жолдықараев – Облыстық дене шынықтыру және спорт басқармасының басшысы:
«Бұл бізге қарамайды. Жергілікті әкімшілікке осы бойынша өтініш хат жіберейік. Қолға аламыз. Үсті шық болған соң ауа-райының да әсері бар».
Спорт алаңшасының тапшылығын министр Дәурен Абаев та үкімет отырысында тілге тиек етті. Елімізде 37 % спорттық мекемелер жетіспейді. Айтуынша, аталмыш нысандардың кейбірі өз мақсатына пайдаланылмайтын болған
Дәурен Абаев – ҚР Мәдениет және спорт министрі:
«Салынған кешендер шынымен де спорт нысандарының жетімділігі бойынша ахуалды жақсартқанын айтқым келеді. Бірақ бұлар құны қымбат жобалар екенін айту керек. Шаруашылық тұрғыдан жабдықтауға үлкен қаржы керек. Олардың кейбірі тұрғындары көшіп жатқан келешегі аз елді мекендерде салынып кеткен. Соның салдарынан кейбір кешендер толық қуатымен жұмыс істеп тұрған жоқ. Ғимараттардың құрамында мақсатына сай қолданылмайтын алаңдар бар»
Мәселені шешуге министр жылдам бой көтеріп, шығыны аз нысандар салуды ұсынды. Айта кетерлігі, облыста 72 мемлекеттік меншіктегі спорт мекемелері мен кәсіпорындары тіркелген. Аталған спорт мекемелерде 51976 спортшыларымен 1450 жаттықтырушы 2022 жылға бекітілген жоспарға орай жұмыс жасауда.
