Шымкентте екі бала тілсіз жаудың құрбаны бола жаздады. 11 және 12 жастағы қос жеткіншек құрылысы аяқталмаған ғимараттың жертөлесінде қоқыс өртеп ойнаған. Салдарынан жертөле түгелдей отқа оранып, олар сыртқа шыға алмай қалған. Абырой болғанда, балалардың бірінде ұялы телефон болып, ол өрт сөндірушілерді көмекке шақырған. Бұл уақытта «112» қызметкерлері құтқарушылармен байланыста болған. Операторлар болса, құтқарушылар оқиға орнына жеткенше, балаларға түтіннен қорғану жолдарын айтып, көмектескен.
Роман Письменский -Шымкент қаласы ТЖД Өрт сөндіру қызметінің мамандандырылған жасақтың қарауыл бастығы:
«Олар қайтып шығатын жолды таппай қалған. Өйткені мына жер біз келгенде көк түтін еді. Біреуі ес-түссіз жатты. Тыныс алу аппараттарын кигізіп, сыртқа алып шығып, балаларды жедел жәрдем қызметкерлеріне табыстадық. Жертөленің алты шаршы метрін шарпыған өрт қысқа уақыт ішінде ауыздықталды».
