«Несиемізді толық өтесек те, банк кепілдегі мүлкімізді бермей отыр». Кентаулық 100-ге тарта тұрғын осылай деп арнамызға жүгінді. Анықтағанымыздай жұртты зар қақсатып жүрген «Яссы Несие» жауапкершілігі шектеулі серіктестігі екен. Ондағылардың құжатын сұрап барған көпшілікті құр уәдемен шығарып салып жүргеніне 1 жылдан асыпты.
«Яссы несие» ЖШС алдына жиылған мына жұрт, бұл жолы несие алу үшін емес, заңды мүлкін қайтарып беруді талап етіп келген. Бірі кепілге үйін, бірі көлігін қойып ақша алған тұрғындар, қарызынан толықтай құтылғанымен мүліктерінен айырылып қалған.
Жәбірленуші:
«Қайын атамның үйін кепілге қойып несие алған едім. Қарыздан толық құтылғанымда тек бір жапырақ қағаз берді. Бірақ үйдің құжаттарын әлі ала алмай жүрмін. Ал, мынау қағаз еш жерге жарамсыз…»
Әбден ашынған тұрғындар ауыл шаруашылық мақсатында несие беруші мекеменің басшысымен тілдесуге келген. Алайда, банк қызметкерлері жиылған жұртқа жекіп, күш көрсетуге дейін барды.
Шыдамы таусылған тұрғындар мекеме директорының кабинетіне басып кірді. Белгілі болғандай бұл ұйымды бұған дейін басқарған азамат алаяқтық бойынша 5 жылға сотталған екен. Онымен қоса оған сыбайлас тағы 3 адам істі болған. Ал, жаңа басшы келеңсіздіктің бәрі сол болғанын және мәселені жақын арада шешетінін айтады.
Алишер Юлдашев – «Яссы несие» ЖШС директоры:
«1 жылға уақыт сот болды. Сотталуы керек адамдар сотталды. Енді мен сіздерге құжаттарыңызды қайтарып беремін деп отырмын. Қайтарамаймын деген жоқпын».
Ал, тұрғындар бұл сөздерді бұған дейінде бірнеше рет естіп, құлағымыз жауыр болды дейді.
Нұрғали Бексінов – жәбірленуші:
«Ертең сіз мекеменің алған қарызын төлей алмай қалсаңыз, аграрлық несие корпарациялары біздің дүние-мүлкімізді тартып алады. Ал, біз сонда не істейміз?»
Мекеме басшысының айтуынша, кепілге қойылған мүліктердің құжаттары «Аграрлық несие корпорациясында» екен. Себебі, «Яссы несие» ЖШС-не 9 млрд теңгеге жуық қарыз берген дәл сол мемлекеттік ұйым. Ал, ондағылар , халықтың мүлкі өздеріне кері қайтады, тек уақыт керек дейді.
Жалпы, «Яссы Несие» ЖШС-нен 500-ге тарта азамат кәсіптерін дөңгелету үшін несие алған. Оның тең жартысы қарызынан құтылып, кепіл мүліктерін қайтарып алғандар. Ал, алаяқтарға алданып қалдық па деп қорыққан жұрт мәселе дереу шешімін таппаса президентке хат жазамыз деп отыр.
