Жамбыл облысында пойыз автокөлікпен соқтығысып, 6 адам көз жұмды

1 қарашада Жамбыл облысының Меркі ауданында автокөлік пойызбен соқтығысып, 6 адам көз жұмды, деп хабарлайды Stan.kz.
Оқиға туралы ақпарат 08.55 шамасында Түрксіб станциясындағы желілік полиция бөліміне келіп түскен. Мәліметке сәйкес Қарасу ауылындағы теміржол өткелінде жолаушылар пойызы Audi автокөлігімен соқтығысқан.
“Көлік апатының салдарынан 6 адам қаза тапты. Осы дерекке қатысты Қылмыстық кодекстің 345-бабы 4-бөлігімен (Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы) сотқа дейінгі тергеу амалдары басталды. Қажетті сараптамалар тағайындалды”, – деді Жамбыл облысы полиция департаменті баспасөз қызметінің жетекшісі Гүлсара Мұхтарқұлова.
Қазір оқиға орнында кезекшi жедел-тергеу тобы жұмыс iстеп жатыр.