Қатты дауыл Кентаудағы әлеуметтік нысандар мен тұрғын үйлердің шатырын жұлып кетті. Тіпті қалада электр бағаналары істен шығып, тұрғындар жарықсыз қалды. Одан қала берді дүлей желдің кесірінен 200-ден аса ағаш құлап, көліктерді басып қалған. Шаһардағы қазіргі ахуал туралы тілшіміз Шынар Әділханқызы тарқатсын.
Дүлей дауылдың зардабын тартқан мектептің сиқы осы. Табиғаттың тосын мінезінен шатыры құлағаннан бөлек, сынып бөлмелерінің әйнектері сынған. Сондықтан балалар бір ауысымда ғана оқуға мәжбүр. Салынғанына 40 жылға жуықтаған білім ошағы бұған дейін бір рет қана жөндеу көрген. Ескі мектебіміздің сау тамтығы қалмады деген жауаптылар білім бөлімінен көмек сұрайды.
Гүлмира Камалова – Түркістан облысы Кентау қаласы Т.Рысқұлов атындағы №24 жалпы орта мектебі директорының м.у.а
«24ші мектептің төбесіне 300 квадрат метр көлемінде шифрлары ұшып, 7 сынып бөлмесінің терезелері шағылып, 10 квадрат метр шығын келтірген. Алайда сол 7 сынып бөлмелеріндегі оқитын сынып оқушылардың барлығы басқа сыныптарға ауыстырылып, бүгінгі таңда шығын көлемі анықталды».
Нөсер салдарынан 1 мектеп, 1 балабақшадан өзге, 2 көпқабатты үйдің шатыры қираған. Сондай ақ, 200-ден аса ағаш құлап, көліктерді басып қалған. Бүгінде оқыс оқиғаға байланысты 109 жедел желі қызметі қосылды. Онда жауаптылардан жауап ала алмағандар фото, видеоларын арнайы мекемеге жолдай алады.
Жанна Әлімбаева – Түркістан облысы Кентау қаласы әкімдігінің баспасөз хатшысы:
«Кентау қаласында орын алған нөсер жауын мен дауылды желдің салдарынан қала тұрғындарының 5 көлігіне залал келді. алайда адам шығын жоқ. 50ге жуық қызметкер, 5 техника жұмылдырылып жұмыс атқаруда. Бүгінгі таңда таңнан қазірге дейін 50 қызметкер қаланы тазалауға атсалысуда»
Жалпы нөсер жауыннан Кентау қаласына келтірілген шығын көп. Мәселен, 5 электр бағаны зақымданған. Салдарынан тұрғындардың 10 пайызы жарықыз қалды. Сондай ақ, қалалық полиция бөлімінің ғимаратына да зақым келген. Қазіргі таңда қаланы тазарту жұмыстары жалғасып жатыр.
